Ættarbandsskráin tøk í Vanga-appini
Nú kunnu øll, ið dáma at fáast við ættargransking og eru áhugað í familjusambondum, brúka Ættarbandsskránna í Vanga-appini. Ættarbandsskráin hevur verið á Vanganum frá byrjan og er ein hin mest vitjaða síðan á Vanganum. Higartil hevur hon bara verið tøk á teldu, men nú er hon loksins við í Vanga-appini eisini.
Vit brúka mest telefonina
Vangin og Ættarbandsskráin hava verið virkin í útvið fýra ár. Skjótt varð greitt, at føroyingum dámar best at vera á telefonini, og uml. 85 % av allari ferðsluni á Vanganum er í appini. Tí var eyðsæð, at Ættarbandsskráin eisini skuldi verða tøk á telefonini.
Rættingar í Ættarbandsskránni
Í Ættarbandsskránni fært tú eitt yvirlit yvir tína ætt í beinari linju, í nøkrum førum heilt aftur til norrøna miðøld. Sært tú eina villu í upplýsingunum, ella hevur tú nýggja skráseting, kanst tú boða Heilsustýrinum frá og viðfesta skjalfesting sum próvgrund.
Stóri áhugin fyri Ættarbandsskránni sæst eisini aftur í øllum rættingunum, sum fólk longu hava sent Heilsustýrinum. Tá ið arbeitt verður við so stórum mongdum av dátum, kunnu feilir koma fyri. Síðan Ættarbandsskráin kom á Vangan, er dátugóðskan nógv hækkað júst orsakað av rættingum frá fólki.
Vónandi taka føroyingar væl ímóti Ættarbandsskránni í Vanga-appini.
- Dáturnar í Ættarbandsskránni eru m.a. úr kirkjubókum, fólkateljingum og Landsfólkayvirlitinum.
- Tú kanst gera rættingar beinleiðis í skránni
- Skjalfesting til rættingar kunnu vera: mynd, deyðsváttan osfr.
- Les meira um Ættarbandsskránna her
Í videobrotinum niðanfyri sært tú, hvussu tú finnur Ættarbandsskránna í Vanga-appini, og hvussu tú gert eina rætting.
