Høvuðsrøðari á ráðstevnu um smittusjúkur

Í farnu viku hildu 90 granskarar og onnur frá tveimum systurstarvsstovum á lærdum háskúlum í París og New York innanhýsis ráðstevnu í Føroyum. Heitið á ráðstevnuni var Second International Symposium on Inborn Errors of Immunity (IEI) in the Northern Atlantic, og granskarar á stovnunum arbeiða einamest við genetikk í sambandi við smittusjúku.

Noomi O. Gregersen frá Fólkaheilsustýrinum luttók sum høvuðsrøðari á ráðstevnuni, og greiddi hon frá um úrslitini frá FarGen 1 (2016-2018), eins og hon nart við bygnað og kanningar í næsta stigi av FarGen, sum er í gongd við at útvega luttakarar í løtuni. Noomi er verkætlanarleiðari fyri FarGen, sum síðani 1. jan. í ár hevur ligið undir Fólkaheilsustýrinum.

Tær báðar starvsstovurnar eru Casanova Lab, St. Giles Laboratory of Human Genetics of Infectious Diseases, Rockefeller University og Laboratory of Human Genetics of Infectious Diseases INSERM/Paris Descartes University.