Hondreinføri

Hondreinføri í sjúkrahúsverkinum og á røktarøkinum

Øll starvsfólk, sum hava samband við sjúklingar/borgarar, skulu brúka hondreinføri.

Í Føroyum verður støði tikið í almennu fyriskipanunum hjá Statens Serum Institut, og til ber at lesa nærri her (Værd at vide om håndhygiejne)

Hondreinføri skal brúkast:

• áðrenn allar reinar mannagongdir

• eftir allar ikki reinar mannagongdir

• eftir at tú hevur brúkt handskar

Dømi um, nær hondreinføri skal verða brúkt:

• áðrenn og eftir røktar-, viðgerðar- og kanningaruppgávur

• áðrenn og eftir samband við slímhindur og húð, sum ikki er heil (t.d. sár, katetur, dren, sondur)

• áðrenn aseptiskar og innræsnar (invasivar) mannagongdir

• áðrenn handfaring av reinari, sóttreinsaðari ella sterilari útgerð

• áðrenn máltíðir og handfaring av matvørum

• millum reina og ikki reina uppgávu hjá sama sjúklingi/borgara

• eftir samband við dálkaðar lutir, útgerð og yvirflatar

• eftir at tú hevur verið á vesinum, hostað, njóst ella snýst tær

Sóttreinsan av hondunum verður brúkt, tá hendur, skøvningar og møguliga undirarmar eru sjónliga rein og turr. Tú skalt brúka 70-85% v/v ethanol við húðrøktarevni til at sóttreinsa hendurnar við. Húðin skal haldast fuktig í 30 sekund við sóttreinsingarevninum, sum verður gníggjað inn allastaðni, til húðin er heilt turr.

Hondvask verður brúkt, tá hendur, skøvningar og møguliga undirarmer eru sjónliga dálkað ella vát eins og tá tú hevur samband við sjúklingar/borgarar við smittandi diarré. Hendurnar skulu vaskast við lunkaðum vatni og sápu. Hendurnar verða skolaðar, sápa verður gníggjað inn alla staðni í 15 sek., síðandi verða hendurnar skolaðar aftur og at enda turkaðar.

Tá hendurnar eru vaskaðar, verða tær eisini sóttreinsaðar.

Sóttreinsan er fremsta valið, av tí at fleiri fyrimunir eru við sóttreinsan samanborið við at vaska sær um hendurnar, tí at sóttreinsan:

• minkar munandi meira nøgdina av bakterium á hondunum

• er mildari fyri hendurnar

• tekur styttri tíð

• krevur ikki eitt hondvask og kann gerast tætt við sjúklingin/borgaran 

Treytir fyri hondreinføri

Fyri at hava gott hondreinføri krevst, at tú ikki hevur ur, ringar ella annað handprýði. Tú mást ikki  langar ella eftirgjørdar negl, íroknað gellac, ella neglalakk. Eisini skulu arbeiðsklæðini hava stuttar ermar.

Kelda: Statens Serum Institut