Persónlagað medisin
FarGen
Málið við FarGen-verkætlanini er at savna lívfrøðiligt tilfar frá føroyingum og fáa kanningar í lag, sum kunnu menna møguleikarnar fyri sjúkufyribyrging og -viðgerð. FarGen savnar bakgrunds-, genom- og heilsudátur í einum dátugrunni, sum er ætlaður gransking í føroyskum ílegum.
18. november 2024
Við FarGen 2 (apríl 2022) varð verkætlanin víðkað, og farið varð undir at kanna ávísar sjúkur, sum hava lutfalsliga høgan títtleika í Føroyum. Málið er at kunna eyðmerkja ílegur og onnur lívfrøðilig mát, sum kunnu vera orsøk til hesar sjúkurnar. Á henda hátt verða ítøkilig stig tikin til at skapa grundarlag fyri persónlagaðum medisini. Persónlagað medisin byggir á vitan um genomið hjá tí einstaka, umhvørvi og lívsstíl, og letur upp fyri at málrætta viðgerðina í størri mun, so viðgerðin virkar á besta hátt.
FarGen mennir eitt føroyskt tilvísingargenom, sum vísir miðal ílegusamansetingina hjá føroyingum, og sum kann geva eitt yvirlit um títtleikan av ymsum íleguvariantum í Føroyum. Eisini verður kannað, hvør upprunin og søgan hjá føroysku búfjøldini er, og hvussu tætt skyldir føroyingar eru í dag.
